"Janti ho, zindagi kitni aziz shay hai?... Bilkul tumhari tarah. Mager zalim hai bewafa bhi kis qadar. kisi lamhey achanak daman jahtak ker chal daiti hai. Jaaney kis janib? Phir laut ker nahi aati. Iss k bawajood insan iss se pyar kerta hai. Bewafa cheezo'on ki parastish insan ki bohat baari kamzoori hai. Iss mein mujh akailey hi ka kia kasoor?

Yeh zindagi aur maut ka silsila bhi ajeeb hai. Kisi zamaney mein mujhey yakeen tha k maut un-daikha parinda khuda ki manind aakaash k undhairo'n mein basta hai aur kisi unjaney lamhey bhookey uqaab ki manind zindagi k ujaley ko jhapat ley jata hai. Tab main maut sey bohat daraa kerta tha. Aik arsey baad mujhe ahsas hoa k maut tu mere undder majood hai. Mere wajood ka aik aisa imkaan, jis k baghair zindagi ka hona mumkin hi nahi. Harr aati sans meri zindagi bhi hai aur maut bhi. Yoon main harr lamha marr bhi raha hon aur zinda bhi hoon. Harr marta lamha naye zinda lamjhey ko takhleeq kiye jata hai. Yehi zindagi ka zinda pehlo hai. Tab maut sey meri dosti ho gaye k hum aik dosrey k muhtaaj thay... majboori ki had takk nakabil-e-juda.

Phir tumhari yadoon ki kainaat per sarr rakhey, jab main ne baishtar sard raatein naher k kinarey chaltey chaltey guzar dein tu main ne pehli baar zindagi ko reeng reeng ker martey daika. Mujhey apney undder aik bohat waseeh muudfin nazar aya, jahan chund tooti phooti kabarein, kuch katbey aur meri un ginat laashein bey-ghaur-o-kafan bikhri pari thi'n. Aur main harr lamhey apni nayi laash haatho'n mein liye mazii ki lasho'n k dhair per phaink raha tha.

Roti tanhaiyo'n k dhair mein apney bichrey "app" ko dhondatey dhondatey mujhe kayee baar yoon laga jaisay tumharey baghair zindagi aik taweel aur bey-maani maut hai. Log tu pagal hain jo samjhtey hain k maut ka koi waqat mauyen nahi. Inhein koi samjhaye k baichara insaan tu zindagi bhar marta rehta hai. Jissey duniya maut samjhey baithi hai, woh tu aik aisa muqaam hai jahan insaan marna bund ker daita hai. Jahan maut ko bhi maut aa jati hai. Log maut k marney ka sog manatey hain. Mager zindagi k marney per koi noha nahi perhta."

~ "Jhootey Roop K Darshan"--Raja Anwar

Kitni Bay-Dard Hawayei'n Hain
Kis Qadar Bay-Khiyali Mein
Darakhto'n Ko Hilati hain
Zard pato'on ko giraaney k liye
Phir Yahi Hawayei'n
Inhein kahan se kahan ley jain gi uraa ker
Na manzil ki khabar na koi thikana ho ga inn ka
Yeh khaza'n raseeda pattey
Idhar sey udhar bikhar jayen
Kuch nahi kahein ge
Phir bhi aik kahani
Iss kahmoshi mein kahin tu ho gi
Mana zindagi maut ki amanat hai
Humaisha sey
Phir bhi Itni
Bay-dardi se na bikhrey koi...!

-------------------------------------
~~Farkkhunda Rizvi~~

Miley tu hum aaj bhi hain laikin,
Na mere dil mein woh tishnagi thi
K tujh se mil ker kabhi na bichro'n
Na aaj tujh mein woh zindagi thi
K jism-o-jaa'n main ubaal aye
Na khawab zaaro'n mein roshni thi
Na meri ankhein charagh ki lau
Na tujh mein khud sapurdagi thi
Na baat kerney ki koi khwahish
Na chup hi mein khobsoorati thi.

Mujasmoo'n ki tarah thay dono
Na dosti thi, na dushmani thi.
Mujhe tu yoon laga hai jaisay
woh Sa-atein bhi ghuzar gayen hain
k jin ko hum zawal samjhey
Woh khwahishein bhi tu marr chuki hain
Jo terey merey laho ki hiddat ko
Akharash baraf ker gaye hain
Muhabatein shauq ki chatano'n sey
ghatiy'on mein utaar gaye hain
Woh qurbatei'n woh judaiya'n sab
Ghubar ban ker bikhar gaye hain

Agar yeh sab kuch nahi tu yeh batla
Woh chahatein abb kidhar gaye hain...?

--------------------------------------------
~~Ahmed Faraz~~